I brosjyren finn du oppdaterte råd om eigenberedskap. På nettsida sikkerhverdag.no finn du brosjyren digitalt på mange ulike språk.

Eigneberedskapsveka (28. oktober til 3. november i 2024) skal gje deg auka kunnskap og gjera deg meir medviten slik at du kan førebu deg betre. I mai 2024 vart råda om eigenberedskap oppdaterterte. Den største endringa er at du no er anbefalt å vera budd på å kunne klara deg sjølv i ei heil veke.

Me lever i ei stadig meir uroleg verd, med mellom anna klimaendringar, krig og digitale truslar. Sjølv om det meste fungerer som det skal i Noreg, må me vera førebudde på at ekstremvêr, pandemiar, ulukker, sabotasje og – i verste fall – krigshandlingar kan ramma oss.   

Er du førebudd? 

Korleis vil du og dine nærmaste klara dykk dersom straumen blir vekke i ein lengre periode? Kva gjer du dersom vatnet forsvinn? Kva om du ikkje får handla på ei veke? 

Straumbrot kan gjera at det ikkje kjem vatn i springen, og føre til at kloakksystem, medisinsk utstyr, lading av elbil, betalingsløysingar, internett, mobiltelefon, radio, kjøleskap og utstyr til matlaging ikkje fungerer som normalt. 

Eigenberedskap handlar om å vera førebudd på slike situasjonar.  

Styrk eigenberedskapen din!  

God eigenberedskap er ei investering i tryggleik for deg og dine nærmaste. I tillegg bidreg du til at styresmaktene kan prioritera dei som treng mest hjelp.  

Ved å vera førebudd for éi veke blir du betre i stand til å handtera alt frå små forstyrringar i kvardagen til større kriser. For ikkje å snakka om at du får betre tid på deg til å planleggja vegen vidare dersom krisa skulle bli langvarig.  

Hugs: Litt førebuing er mykje betre enn inga!  

Eigenberedskap for ei veke

Her finn du døme på ting som er lurt å ha heime. Gå gjennom behova dine, og sjå på kva løysingar som er moglege der du bur. Hugs at familie, venner og naboar kan samarbeida om eigenberedskap. Sjekk lageret ditt med jamne mellomrom. 

Sjekkliste for eigenberedskap 

  • Reint drikkevatn lagra på kanner eller flasker.    
  • Mat som toler å bli oppbevart ved romtemperatur.   
  • Grill, kokeapparat eller stormkjøken.   
  • Varme klede, pledd, dyner og soveposar.   
  • Fyrstikker og stearinlys.    
  • Ved, dersom du har vedomn eller peis.   
  • Gass- eller parafinomn som er berekna på innandørs bruk er eit alternativ til vedfyring.   
  • Avtale om overnatting dersom du ikkje har alternativ oppvarming.
  • Lommelykter eller hovudlykter som går på batteri, sveiv eller solceller.  
  • DAB-radio som går på batteri, sveiv eller solceller.    
  • Legemiddel og førstehjelpsutstyr.   
  • Jodtablettar (gjeld barn og vaksne under 40 år, gravide og ammande).    
  • Hygieneartiklar som mellom anna våtserviettar, handsprit, bleier, dopapir og menstruasjonsprodukt.   
  • Batteri og fullada batteribank.   
  • Litt kontantar og fleire betalingskort.   
  • Mat og vatn til kjæledyr.  
  • Liste på papir med viktige telefonnummer som til dømes naudnummer, legevakt, veterinær, familie, vennar og naboar. 

Les meir om eigenberedskap på sikkerhverdag.no

Advice on self-preparedness for emergencies