Målet for folkehelsearbeidet er at innbyggarane skal ha god helse så lenge som mogeleg, og at alle skal ha like moglegheiter til oppnå god helse.
Folkehelsearbeid er tiltak som styrkjer helsa til innbyggarane, anten direkte eller indirekte. Det kan handla om oppvekst- og levekårsforhold som bustad, utdanning, arbeid og inntekt, fysiske og sosiale miljø, ernæring, fysisk aktivitet, førebygging av skadar og ulykker, tobakksbruk og alkohol- og annan rusmiddelbruk.
Når kommunen legg planar, skal me ta omsyn til folkehelsa, i tråd med Folkehelselova og Plan- og Bygningslova § 3-1.
Folkehelse angår alle delar av den kommunale organiseringa. For å lukkast med dette arbeidet, må me jobba på tvers av ulike sektorar og tenester.
Folkehelsearbeidet tek utgangspunkt i at samfunnet har eit ansvar for helsa til befolkninga, ved å leggje til rette for gode levevanar og trygge levekår.
Folkehelseoversikt Sogndal kommune
Folkehelselova krev at kommunen har oversikt over helsetilstanden til innbyggjarane. Denne oversikta er viktig for at Sogndal skal kunne jobbe for ei utvikling som fremjar folkehelsa, slik at alle har like moglegheiter til god helse.
Folkehelseoversikta skal gi eit bilete av korleis helsetilstanden er i dag blant folk i Sogndal, og kva som verkar positivt og negativt inn på helsa vår.
Folkehelseoversikt for Sogndal kommune 2022-2026
Rocket-Man
Rocket-Man er eit inkluderande og aktivt fritidstilbod for ungdom mellom 13 og 18 år i Sogndal kommune. Me ønskjer å skape ein trygg møteplass der ungdom kan vere seg sjølve, bli kjende med nye menneske og oppleve meistring gjennom varierte aktivitetar.
Kvar ungdom som deltek, blir kopla saman med ein aktivitetsguide – ein ung vaksen mellom 18 og 30 år som fungerer som ein «storebror» eller «storesyster». Aktivitetsguiden planlegg og deltek på aktivitetar, byggjer gode relasjonar og bidreg til at alle kjenner seg inkluderte og trygge.
Me tilbyr eit breitt spekter av aktivitetar, som kan variere frå friluftsliv, trening og kreative prosjekt til matlaging, spelkveldar og andre sosiale samlingar. Aktivitetane blir tilpassa og utvikla i samarbeid med ungdomane sjølve – det er deira interesser og ønskje som står i sentrum.
I tillegg til aktivitetsguidane har me med trygge, frivillige vaksne som støttar opp om fellesskapet og bidreg med erfaring, omsorg og engasjement. Saman byggjer me eit varmt og positivt miljø der ungdom kan utvikle vennskap, få nye erfaringar og ha det kjekt saman.
Rocket-Man er ein del av Sogndal kommune si satsing på ungdom. Arbeidet er allereie godt i gang, og målet er å etablere eit tilbod i heile kommunen – frå Balestrand til Kaupanger – slik at fleire ungdomar kan få ein fast og trygg fritidsarena å høyre til.
Les meir om oss her: